Pamamaga ng Mata Dulot ng Virus

Pangangalaga sa tahanan

• Maglagay sa apektadong mata ng isang malinis na tuwalyang ibinabad sa malamig na tubig, 3 hanggang 4 na beses sa isang araw (bago maglagay ng gamot sa mata).

• Pangkaraniwan na magkaroon ng pagtagas ng mucus sa gabi, dahilan para maglangib ang mga talukap pagsapit ng umaga. Gumamit ng malinis, maligamgam at basang tela para punasan ito nang dahan-dahan.

• Hugasan ang anumang telang ginamit para linisin ang mata pagkatapos gamitin nang 1 beses. Huwag itong gamiting muli.

• Kung nagsusuot ka ng mga contact lens, huwag gamitin ang mga ito hanggang sabihin ng iyong tagapangalaga ng kalusugan na puwede na. Kapag bumalik ka na sa paggamit nito, gumamit ng mga bagong lens.

• Kung ireseta ang mga antibiotic na gamot, inumin ang mga ito ayon sa itinagubilin. Huwag ihinto ang pag-inom nito hanggang sa sabihin sa iyo.

• Maaari kang gumamit ng acetaminophen o ibuprofen, upang makontrol ang pananakit, malibang ipinayo ang ibang gamot. Kung ikaw ay matagal nang may sakit sa atay o bato, makipag-usap sa iyong tagapangalaga ng kalusugan bago gamitin ang mga gamot na ito. Makipag-usap din sa iyong tagapangalaga kung nagkaroon ka na ng ulser sa sikmura o pagdurugo ng pantunaw. Hindi dapat gamitin ang aspirin ng sinumang may sakit na wala pang edad na 18 taon. Ito ay para maiwasan ang malubhang sakit na tinatawag na Reye syndrome. Maaari itong magdulot ng malalang pinsala sa atay o pinsala sa utak.

• Hugasan ang iyong mga kamay bago at pagkatapos hawakan ang apektadong mata. Tumutulong itong maiwasan ang pagkalat ng impeksiyon sa iyong kabilang mata at sa iba pang tao.

• Hindi dapat magpahiram ng tuwalya, bimpo, at pansapin sa kama ang nahawang tao sa ibang tao. Ito ay upang mapigilan ang pagkalat ng impeksiyon.

• Nakahahawa ang sakit na ito sa unang linggo. Dapat ilayo ang mga batang may ganitong sakit sa day care at paaralan hanggang sa mawala ang pamumula.

Follow-up na pangangalaga

Mag-follow up sa iyong tagapangalaga ng kalusugan, o ayon sa ipinayo.

Kailan hihingi ng medikal na payo

Tumawag kaagad sa iyong tagapangalaga ng kalusugan kung mangyari ang alinman sa mga sumusunod:

• Lumulubha ang paningin

• Lumulubha ang pananakit ng mata

• Lumulubha ang pamamaga o pamumula ng mga talukap

• Kumakalat ang pamumula sa balat sa palibot ng mata

• Maraming berde o dilaw na langib at tagas mula sa mata

• Matinding pangangati sa mata o sa palibot nito

• Lagnat na 100.4°F (38°C) o mas mataas, o katulad ng itinagubilin ng tagapangalaga ng iyong kalusugan